جبر الخواطر على الله
وقسمت العدل حوسه
القاضى ياكل اللحمه نيئه
وكفايه على حبل الجاموسه
ميزان العدل ايه جرا له
سلاسل القيد شددوهه
القاتل ياخد حصانه
والقتيل جتته فتفتوها
الطرح ناقص ربايه
خلى الفاظك حسيسه
الناس بتسمع كلامك
القاضى حكم بالبراءه
على
ولاد الخسيسه
والجمع جمع الندامه
لبس توب السواد
لاينفع فيه الملامه
رباية ولاد اللئيمه
ااااه يا بلدنا حيروكى
ميه ملحه وساقوكى
وتوب العفاف خلعوكى
ولعنوا جدود سلسفين ابوكى
ولاد عم خال ابن بنت اخوكى
انتوا بقى احسبوها
اوعى حد يقول لى هو دا طرح غلى
لا واطى ولا على
كله ماشى فى ضلى
وتوبى مهلهل هلايل
يدوب من طولى طايل
وعرض السكك نص مللى
يدوب يكفى جمايل
ضلوع تلاته تساويهم
ان راح واحد تلاقيهم
راحوا فى دنيا البلاوى
عدل على الكل ماشى
ودستور ياعم يا غباشى
يحمى رجلين الكراسى
وشط بحرك يا بلدنا
عايم من غير المراسى
والغلابه فيك يا بلدنا
ناس توحد باريها
عايشه تحسب حسابها
مالها وما عليها
بتحسب
تجمع وتقسم
و تطرح اللى عليها
ادى حساب كنت ناوى
اكتبها كلام للغناوى
وكنت مع طبيب مداوى
حاطط همى فى بلايا
حمدت ربى انى عايش
ورجعت اعاكس واناكش
وعارف يوم الحساب
ليست هناك تعليقات:
إرسال تعليق