عيني عليّه بين الامم .. باندبح ف اليوم الف مرة
النهادة كتفوني زي الغنم .. دبحوا صوتي وقالوا حرة
كتموا فيّا صوت الألم .. دبحوا النسر ف قلب العلم
جابوا حزام ..عملوا لجام
و الاحكام.. جابوها من برة
النهاردة طلعوا ولادي .. وقفوا قصادهم قالوا لاء
بعلو الصوت قالوا بلادي .. ويا صوتهم صوت الحق
ردوا عليهم بالتزوير .. وم الحرامية جابوا غفير
وم الاعلام .. جابوا خدام
يذيع اوهام .. ضد الصدق
و هارجع تاني للتعذيب .. و هايرجع شعبي للإزلال
دورة جديدة للتخريب .. سرقة و نهب و دم عيال
جمر و نار و دم نزيف .. مين ف ولادي لسة نضيف
أهر و زل .. و حر ف ضل
و عقد الفل .. يروح لجمال
بيني و بينكم حد الله .. لو هاتسيبوا دمي يروح
ياخدوا صوتكم بالاكراه .. و انتوا تقولوا حلاوة روح
اوعوا تقولوا تاني احرار .. انتوا ف سجن مالوش اسوار
اقفوا حداد .. ع الأولاد
و الاحفاد .. مش هاتروح
بكرة ولادكو يدعوا عليكو .. لما يفوقوا يلاقوا كابوس
مانتوا دعيتوا على اهاليكو .. لما الضحكة بقت بفلوس
ابني الاصلي تحت ترابي .. قوم يا سعد قوم ياعرابي
داسوا مقدارك .. و انت ف دارك
و نسل مبارك .. بكرة يدوس
بكرة يجيبوا كمان امريكا .. وعلى انفاسكم يبنوا مقام
و ها يقابلوها بالمزيكا .. و انت يا مصري تعيش خدام
يمكن ياخدوا كمان النيل .. و انت هاتشرب م البرميل
ياخدوا الدم .. لولاد العم
تعيش بالهم .. و تموت بلجام
حسبي الله و نعم الوكيل
خالد صابر
من تاليف مصرى خالد صابر
ليست هناك تعليقات:
إرسال تعليق