عم حبظلم جالك يظلم تديله ايه
تديله صوتك .. لا خليه
اصله حايخده بيك من غيرك
وان جيت ترفض .. يقطع ديلك
اصله معاه الجاه و العسكر
وجرايد كده لونهم اصفر
تصحى تنادى يحيى حبظلم
تدخل نادى تلقى حبظلم
تطلع كوبرى تنزل حفره
تدخل شغلك برضه حبظلم
طب دانا مرة جيت اتوضى
نزلت م الحنفيه حبظلم
اصل حبظلم كان ياماكان
فى زمن تانى ليس الان
كان راجل عايش وف حاله
كل حياته البيت و عياله
وطلع طلعه كانت هى
بص وشاف السعد قباله
جابه العمده و قال يا حبظلم
اقعد جنبى و بكره حتحكم
هوب ف عركه العمده انطخ
عم حبظلم هر و سخ
قال مش قاعد غير كام يوم
دى العزبه مليانه هموم
القول قولك عم حبظلم
اتعلم من يومها العوم
موجه تشيله و موجه تحطه
واللى يلاعبه واللى يخضه
واللى يقوله ياعم كفايه
واللى يصرخ آه يا قفايا
انه يفارق بيت العمده
زى ما قال سابق دا يومين
عم حبظلم مسك الكرسى
وقال مستنى ليوم الدين
طب يا حبظلم خف شويه
بل لى ريقى بحبه ميه
نفسى ياعم اربى عيالى
وانام ليله مرتاح بالى
نفسى احس ان انا بنى ادم
وان مقامى ف عزبتى عالى
وان خفير العزبه جنابك
مش حارسك و سايبنى الالى
وانى ساعه ما احب أصوت
ملقاش صوته اتحط بدالى
داحنا غلابه ياعم حبظلم
مش بنحب الصوت العالى
مش غاويين جرسه و مشاكل
و رضانا دا رخيص مش غالى
لو بالعدل ما بينا حتحكم
راح نهتف ونقولك تانى
لكن باين ان حبظلم
عمره ما يوم حيسيبنى ف حالى
اصله شايفنا كماله ما نسوى
و حيستورد شعب بدالى
و حيتكبر و حيتعظم
وابنه حيجى يربى عيالى
و العزبه حتتسمى حبظلم
وابقى قابلنى يالى ف بالى
ليست هناك تعليقات:
إرسال تعليق